冠忠南區挑機由細做起

2018/07/12

冠忠南區挑機由細做起

港超地區球隊冠忠南區昨午在數碼港舉行了新球季啟動禮,對外展示全新主場及作客球衣,以及新一代會徽。主席陳文俊強調,雖然球隊在財力方面無法與友會相比,但副主席黃焯添、主教練鄭兆聰和他深信,只要由一些細微位着手,可以建立到一支具競爭力及得到球迷支持的球隊。

新季班費超過一千萬的冠忠南區,昨午在啟動禮上,先由「陳主席」為大家介紹球隊的組軍工作,他謂:「球隊上季個頭開得唔好,又面對過低潮,所以喺季後我哋好仔細咁去檢討過,決定向一啲微細位埋手,希望可以避免之前遇到嘅問題。好似搵咗同Ricky(鄭兆聰)識咗好耐嘅貝可泓做助教,加強教練團班底;另外搵外援唔再諗新面孔,而係羅致曾經喺友會有好表現嘅外援(見附表),唔使再擔心適應唔到或者貨不對辦;仲有喺青訓方面放多啲資源,吸引更多有潛質嘅年輕人加入梯隊等等,希望各方面都可以起到作用,令球隊向好嗰方面發展落去。」

面對亂局先要自己唔亂

新一季港超聯烽煙四起,R&F富力和理文來勢洶洶、傑志繼續引入星級外援、東方龍獅人腳大換血,黃焯添指面對「亂局」首要是「自己唔好亂」,他說:「其實大家都好積極,預期新一季都會好熱鬧,今次我哋簽外援唔求新鮮感求實用,配合原有班底,會集中去挑戰盃賽,希望可以捧到盃同攞到亞洲賽資格。」除了一班港超球員,新鮮出爐「賽馬會青少年聯賽足總盃」冠軍的冠忠南區U18成員亦是啟動禮的座上客,「阿添」表示適當時候便會提升個別「冠軍功臣」上一隊。

冠忠南區昨安排全體球員展示新季球衣,主場球衣以紅、白二色為主調,作客球衣就由白、灰、紅三色構成,龍門波衫則有螢光黃、橙及黑色三款,稍後會公布球迷版發售詳情。冠忠南區下月將會到泰國作季前集訓,期間會與泰國U23拍跳。