花蕾帶你睇金魚

2017/10/13

花蕾帶你睇金魚

最近花蕾應網站「Dxbeppin-R」嘅邀請,進行「お散步たん」企劃活動,充當嚮導帶各位去日本不同地方遊玩一番,而今次花蕾去到日本橋一帶參加當地嘅夏祭活動以及遊歷不同景點。為咗隆重其事,花蕾喺拍攝之前,晨咁早就換好一身最適合喺夏天着出街嘅浴衣,以及去髮型屋Set好個頭,然後去到東京日本橋知名地標麒麟像前會合攝影隊。之後,花蕾為祈求拍攝順利,走到附近嘅福德神社參拜一下,做足功課嘅花蕾仲介紹話呢間神社歷史悠久,喺公元9世紀建成,迄今已經過千年歷史,知名戰國偉人德川家康都參拜過呢間神社添!入得神社除咗求神祈福,當然唔少得求籤啦!花蕾靚女又親切可人,結果畀佢抽到支「大吉」籤,籤文話花蕾金錢運上升,至於戀愛運方面呢?籤文就話只要花蕾肯付出的話,一定有收穫喎!唔知花蕾有冇令佢甘願付出嘅對象呢?

求到支好籤,花蕾心情大好,之後走咗去Art Aquarium 2017場館,欣賞琳琅滿目嘅夢幻金魚缸以及顏色艷麗嘅金魚,花蕾話睇完之後成個人都輕鬆晒,再食埋場館小食店出售嘅金魚特色甜品,心情可謂加倍開朗。睇完金魚,花蕾又去咗一個名為Art Aquarium夏祭嘅活動玩攤位遊戲,雖然遊戲眾多,但係由於時間關係,只係玩咗釣波波同射靶,而花蕾玩遊戲有運之餘,仲有技術,最後贏取唔少獎品,簡直係滿載而歸!玩完遊戲,花蕾覺得肚仔餓,咁就啱喇!因為夏祭有一個激辛美食節,提供嘅全部都係辣到飛起嘅菜式,自問無辣不歡嘅花蕾當然唔會入寶山空手回啦,即刻嗌咗個激辛刀削麵、激辛韓式炒雞及號稱辣度為辣椒仔辣汁401.5倍嘅印度激辛咖喱飯!試完前兩款菜式,花蕾都辣到標晒汗,仲話個口好似被火燒一樣,可能因為已經辣到麻木晒,食咖喱飯時就唔覺得太辣喇。如果大家想睇花蕾玩遊戲同挑戰勁辣菜式嘅片段,可以Click上網睇睇。

網址:https://www.youtube.com/watch?v=wM-SZaoLOuo

撰文:賢