李恩書甜辣混合體

2017/09/14

李恩書甜辣混合體

有人話甜與辣嘅滋味,比酸同辣合併一齊時嚟得更加過癮,若然這種味道換喺女性身上,又會唔會畀到大家難忘嘅感覺呢?嚟自南韓嘅模特兒李恩書,被喻為甜與辣嘅混合體,而所謂嘅甜同辣,就要等大家慢慢品味一下,至可以感受到箇中嘅韻味。

熱愛表演

喺南韓仁川出生嘅李恩書,其實佢嘅辣味係後期先至滲透出嚟,而甜味則早喺佢細細個嘅時候已經充分流露,因為佢樣子甜美可愛,所以當時已經參與舞台劇及舞蹈演出。正因為細個時嘅經歷,令佢慢慢對表演工作產生興趣,不過佢為咗學業,惟有減少表演活動,及至大學時期,終於有時間重拾昔日表演之心,並開始以兼職攝影模特兒身份涉足模特兒界。佢之所以有咁嘅決定,一來係為咗滿足對演出嘅熱情,二來趁住呢個機會累積演出經驗,但係佢估唔到竟然因此而愛上模特兒工作,畢業之後,便加入模特兒界成為當中一分子。

由於恩書有相當演出經驗,故事務所即安排佢喺釜山舉辦嘅國際汽車展以車模身份登場,雖然呢次係佢第一次喺大型展覽會上亮相,但憑住豐富嘅經驗,加上甜美動人兼玲瓏浮凸嘅誘人外形,唔單止獲得好評,更取得相當嘅人氣。初次演出非常成功,不但為佢打下一支強心針,更令佢對未來嘅工作前景抱有極大憧憬和信心。及後,佢先後喺多個電子產品展銷會同遊戲展上擔任Show Girl,並且開始攝影模特兒工作,而佢甜美可愛嘅形象深入民心。

意外驚喜

正當佢嘅模特兒工作踏上正軌時,卻開始有其他諗法,皆因佢發現自己甜美嘅形象會影響佢所接嘅工作,尤其係一啲商品展銷會,皆因對方希望搵個成熟又火辣嘅女郎為品牌站台,所以佢一直未被睇中。為咗開闊演出空間,佢決定變換形象,以成熟兼性感嘅造型示人。佢本身擁有前凸後趷嘅火辣身材,化身成迷人火熱女郎後,更將性感美推高一個層次,而最令佢估唔到嘅係,呢個新形象竟然大受歡迎,就係咁樣,佢由甜美可愛少女變成一個火辣十足嘅性感女郎。

好多時模特兒轉變風格之後,往往好難返回頭,之但係呢個問題卻唔會喺恩書身上發生,點解?皆因同佢細個嘅表演經歷有關,原來佢細個演出舞台劇時,導師同佢講要識得點樣投入同抽離角色,而呢番說話從此深深地刻印喺佢腦海中,及至今時今日佢便將呢種技巧套用喺模特兒演出上,當佢以冷艷火辣嘅形象示人,便會催眠自己,將內裏嘅誘惑味道散發出嚟。當工作完成後,佢會話畀自己知係時候做番自己,結果令佢減少工作壓力,最重要係令佢更易喺火辣同甜美形象之間作出轉換。佢坦言自己偶爾都會混淆咗兩種唔同風格,尤其係當佢需要表現出甜美時,佢有時會唔覺意擺出誘人嘅甫士,但係呢種偶爾為之嘅失誤,往往令攝影師有意外嘅驚喜。

精彩推介

簡介:李恩書出道之初憑住可愛外形深得大家歡心,而隨住時間推移,唔少人驚覺原來呢位甜姐兒郎竟然可以辣味十足,尤其係當佢露出一條深長嘅事業線時,大家總係會被佢深深吸引。如果大家想了解佢多啲,以及睇多啲靚相,就要Click入呢個網站喇!

網址:http://cafe.daum.net/LeeEunSeo

李恩書Profile

出生地:仁川

身 高:168cm

三 圍:33、22、34

撰文:魂