華僑報 (2019/09/12)

娛 樂 | 湯怡大派自製月餅 難忘中秋節puppy love

 臨近中秋,早前,謝霆鋒返公司向同事派發自家品牌派月餅,原來同門師妹湯怡(Kathy)於近年的中秋節,亦會自家製月餅送給同事朋友。由於月餅不能存放太久,因此只能夠於中秋節前幾天開始製作,不過如遇着開戲日子,Kathy便要犧牲睡覺時間,捱更抵夜做月餅,十分有心。

 Kathy表示其實一向對烹飪有興趣,從小到大都有跟媽咪學煮食,「早幾年開始都有報讀課程,學整唔同款式嘅月餅,所以每年都整三四款唔同口味畀大家試吓,中秋節見到大家食得開心又可以同屋企人分享,我都好滿足。」她希望同事朋友收到月餅,能感受到她的心意。不過這次她製作月餅時不小心被焗爐燙傷,所以今年的月餅可謂有血有淚。

 提到難忘嘅中秋節,Kathy説小時候每年都會在屋企樓下玩蠟燭,「有一年家姐個好朋友帶咗細佬落嚟一齊玩。升中一之後,大家坐隔離仲相認返,曾經展開過一段puppy love。」至於如何渡過今年的中秋節,Kathy則謂要為下月電影開拍作訓練,「角色相當大挑戰,亦做咗好多資料蒐集。所以今年中秋除咗同屋企人食飯,多數都留喺屋企睇電影,參考唔同角色。」◇