華僑報 (2018/01/13)

娛 樂 | ​ 潘瑋柏肺炎缺席《鋒味》 超蓮阿嬌義氣頂上

 意外意外,即係意料之外,今日(一月十三日)播出嘅《鋒味》真係一波三折,首先嘉賓潘瑋柏甩底、大廚謝霆鋒喺比賽前夕重感冒冇晒味覺、拍攝期間又係咁落雨……突然諗起周星馳一句對白:「邊個夠我慘」

 原本謝霆鋒請嚟潘瑋柏做嘉賓,點知佢病咗肺炎嚟唔到,臨時臨急點算好?好彩霆鋒人緣好,臨時拉夫都可以搵嚟賭王三房千金何超蓮同埋師妹鍾欣桐(阿嬌)幫拖。

 今次《鋒味》去到揚州拍攝,為咗要完成今期挑戰「三百人食用的大鍋揚州炒飯」,病到冇晒味覺嘅霆鋒帶住阿嬌同超蓮喺揚州捐窿捐罅掃街試食炒飯,嗱,雖然超蓮係賭王千金咋,但佢出名貼地,喺香港掃街唔出奇,估唔到大陸都照掃可也,呢啲(女)朋友仲邊度有得頂?◇