華僑報 (2017/09/14)

娛 樂 | 蔡一傑許志安厠所試音

 蔡一傑相隔十四年再推出個人專輯,為隆重其事,特別邀請相識三十年的好好好朋友,兼同門師弟許志安合唱其中一曲《男藍》,雖然他們聲底不同但超夾,果然名師出高徒。拍攝MV期間,安仔爆料指最初在傑仔屋企的廁所試音,兩個大男人關在廁所內嗌到拆天,幾乎嚇到家傭姐姐報警,非常搞笑!

 早前《男藍》推出對唱版MV已引起不少好評迴響,安仔和傑仔的歌聲出乎意料地夾,故事版MV亦已曝光,傑仔飾演樂觀的「帥氣酒保」和的士司機,而安仔飾演「灰爆打工仔」。安仔搞笑投訴:「劇本與現實不乎,我性格好樂觀㗎!」至於今次拍攝MV班底是傑仔經典金曲《失樂園》的導演和攝影師,傑仔說:「《男藍》由何秉舜作曲和周耀輝填詞,MV導演郭嘉萍和攝影師都係老朋友,佢哋依家係演唱會導演嘉萍同埋大品牌廣告嘅攝影師邦哥,能夠請得到佢出山拍MV,除咗重金禮聘,更因為大家好有感情,佢哋認為呢首歌夠晒份量先至肯拍!」期間安仔更一展球技,導演特別要求某幾個桌球如何「走位」,安仔就一Q完成,全場大讚!

 安仔和傑仔首次合唱,試音是必要的,第一次試音竟然不是錄音室而是在傑仔屋企的洗手間!安仔邊笑邊說:「我哋第一次試唱呢首歌就喺傑仔屋企廁所,當日我喺佢屋企食飯,然後我哋就入廁所試唱,鍾意廁所唱歌有回音。但其實當時我好驚,嘩,兩個男人閂埋廁所門,喺裏面大嗌喎!我驚傑仔嘅家傭姐姐聽到會嚇到報警,我好盡量唱得細聲啲!」傑仔憶起都忍不住大笑。◇