【操盤手札記】青春股VS更年股 - 割柑人 | 專欄 | 日報 | 財經 | 20191203

2019/12/03

感恩節剛過,聖誕節將至。本來係親朋歡聚嘅日子,但香港經歷半年反修例示威,社會撕裂,談何歡聚?學生同林鄭嘅關係,以至香港同中國嘅關係,有如青春期遇上更年期,一個講自治,一個講管治。阿媽打仔,Uncle Sam插手,阿爺嬲爆。

臨過感恩節,美國總統特朗普簽署《香港人權與民主法案》,法案最辣之處,其一每年審視香港自治情況,先畀特殊待遇;其二點名英、澳、加、日、韓等盟國共同協作,推廣香港人權民主。對中國嚟講,係「廢紙一張」定後患無窮?心照。

中美為香港嗌霎,港股反應尚算冷靜,一來香港被撤銷特殊待遇嘅風險好低,因為咁唔符合美國利益,美國舊年喺香港賺取嘅貿易順差達311億美元;二來香港問題相對中美貿易談判,未算big deal。周一,港股反彈0.4%,收26444。人權法案對中美關係嘅負面影響大致消化,後市主要睇貿談進展。市場預期美國將於月中押後關稅加碼,並將敲定兩國大佬見面嘅時間同地點,估計會喺1月瑞士達沃斯世界經濟論壇期間。除非出現重大利淡消息,否則港股短期26300料有支持。

喺股票市場,都有青春期股、更年期股,視乎企業處於生命周期——發展期、成長期、成熟期、衰退期,邊個階段。青春期股處於成長期,更年期股則處於成熟期。不過,喺成熟期,都有機會再成長,典型例子就係阿里巴巴(9988)。

20年前,阿里靠B2B生意起家,淘寶業務成熟後,利用其資金、人脈、經驗等資源,發展支付寶,再發展螞蟻金服,又發展阿里雲等業務,一路再成長;阿里雲現為集團收入增長嘅重要引擎。5G時代來臨,阿里繼續「有錢途」,可考慮190元買入,上望220元,174元止蝕。

割柑人
本欄逢周二刊出