【金手指】黃金機會化烏有 - 孫柏文 | 專欄 | 日報 | 財經 | 20191203

2019/12/03

過去兩個禮拜,孫柏文喺本欄都話過區議會選舉,將會係「止暴制亂」嘅黃金機會。因除我哋香港人出咗啖氣外,只要北京識把握,有相應嘅措施同說話出台,就搞掂。

當然,我亦警告過話以當今北京四面楚歌之勢,銀行系統千瘡百孔、資不抵債,脆弱都不得了時,佢哋亦要「二仔底」死跟,強硬到尾唔投降。啱啱嘅周末,真係不幸言中,又再一次派啲差佬出來「只暴製亂」。黃金機會,化為烏有。

無辦法,大陸現有嘅管治能力,就只係限於啲每年人均經濟生產力低過一萬美元嘅經濟體,睇落到咗佢哋系統、思維嘅極限。畀個人均四萬六美元嘅一級方程式引擎佢,遲早搞爛。

英國佬當年留低好多個維持政治控制力嘅系統,佢哋不但唔識用,仲要唔識貨咁拆散佢。Neccesity is the mother of invention,有需要、便發明乃任何族群生存之道。英國佬作為好暴力之民族(揮軍打他國之紀錄保持者),啲權貴階級就死咗好多自己人後發明咗選舉呢個東西。

喺香港,畀你哋好「民主」咁選幾百個冇乜實權嘅議員,真係齋噏嘅代議士,就已令上周太平十日八日。不過更勁嘅控制系統一到班廢柴「寧左勿右」或高分低能填鴨手中,即廢武功。其實,呢個咪就喺呢廿二年來,香港的故事了。

孫柏文
獨立股評人
http://fb.com/shuen
本欄逢周二刊出