【大棋局】新浪潮正在逼近 - Mr. Tregunter | 專欄 | 日報 | 財經 | 20191203

2019/12/03

Tom Cruise穿上武士裝束跟在渡邊謙身後,手執兩尺長太刀迎戰對面的火槍與大炮。電影《末代武士》講一個發生在19世紀的故事,一個日本時代革命的故事。中文「革」字指去毛加工處理的獸皮,大改變之意。19世紀係不同文化制度之間的大爭之世,清朝面對列強入侵,日本也面對黑船來襲。

西方國家突如其來的通商經貿衝擊舊農業社會,日本幕末時代經濟出現問題,通脹嚴重。雖然幕府嘗試多次改革,但亦只係小修小改,經濟問題令民情對幕府越來越不滿。加上簽下不平等的《安政條約》,社會開始出現一種聲音,就係幕府應該倒台,將政權交還畀天皇。由此出現二分之勢,擁護幕府一派盡最後努力鞏固幕府執政地位,維新派則主張權力回歸天皇。

新選組為前者代表,旗幟上只有一個「誠」字,就係對幕府盡忠;西鄉隆盛為後者代表,要求尊皇攘夷,也就係電影中渡邊謙的取材形象。

咁點解電影中渡邊謙會同天皇作戰?西鄉隆盛幫天皇打敗幕府軍建立新政府,但維新改革舊武士被削權,大量武士失業。西鄉隆盛主張出兵朝鮮解決武士失業問題,不被採納,毅然辭官。其後情勢將佢推上成舊武士領導者,於是西鄉隆盛再同新政府打一仗。世情之演變,往往會驅使人去唔同位置。靖國神社亦由此而建。維新派建東京招魂社紀念為倒幕而犧牲的武士,明治天皇取《左傳》「吾以靖國也」一語,東京招魂社改名為靖國神社。

中國遲遲唔肯簽中美貿易協議,除咗以拖延還價,等待情勢有異,亦害怕簽完出現後續問題。中方不斷強調貿易協議要平等,即現時的協議係一條不平等協議。中國經濟增長高峯已過,現下係水退之時,過去經濟高速增長所掩蓋的問題將陸續浮現。如果簽不平等協議,容易在經濟出問題時成為責難焦點。

經濟失衡,人心會躁動;若對外遇挫,將觸發改革思潮。中共處理香港的手法,亂嚟;中美貿易協議,就算簽亦只係錢能解決的初階矛盾;明年台灣大選,民進黨可能再下一城。若一個社會開始出現只言忠君,不問是非,你就知道一股浪潮正在逼近。

Mr. Tregunter
本欄逢周二刊出