求驗客手記:被女模指控強姦甩身 尼馬反告誹謗勒索 | 日報 | 體育 | 20190912

2019/09/12

唔好以為只有電影情節先有「原告變被告」,今時今日嘅香港甚至遠在巴西,都有機會發生呢種情況。巴西警方禮拜二就話,之前指控被巴西球星尼馬強姦嘅女模Najila,涉嫌誹謗、敲詐勒索一名世界知名球星,遭巴西警方正式落案起訴,睇嚟都一身蟻!已經甩身嘅尼馬都唔見得幾好,事關禮拜二佢代表巴西鬥秘魯後備上陣又插水,結果巴西仲要輸埋波,唔知今夏鬧轉會唔成嘅尼馬,過幾日返到球會巴黎聖日耳門(PSG)之後,會唔會又冇波踢要坐冷板呢?

話說今年六月初,Najila喺巴西警局指控尼馬,喺五月於巴黎一間酒店將佢強姦,雖然Najila認自己係自願飛去巴黎同尼馬發生關係,但唔鍾意尼馬唔用安全套,仲話尼馬後嚟夾硬嚟,但尼馬就當然否認喇!後嚟當地檢察官就話,Najila冇同警方提供聲稱擁有尼馬打佢嘅片,又唔肯畀警方查電腦同手機,醫療報告亦話Najila只係手指受傷,無法證明佢係被強姦,結果最終因證據不足而銷案。事隔一排,巴西警方禮拜二決定以涉嫌誹謗、敲詐勒索等罪行起訴Najila,仲告埋Najila嘅前夫涉嫌喺網上發佈色情內容,唔知係咪因為得罪咗勢力人士而被秋後算賬呢?

踢完今場波大家可能見唔到尼馬一排,事關佢要返到一直雪藏佢嘅球會PSG報到。佢老竇近日就爆料,話尼馬作為一名巴西人,只想去自己開心嘅地方踢波,佢聽到巴塞隆拿嘅朋友嗌佢返去都好感動,但尼馬合約中冇解約條款,所以轉會最終都傾唔成,冇心情踢波嘅尼馬,可能會繼續被PSG雪到硬囉!