求驗客手記:最多cap指揮官史奈達掛靴 再見荷蘭好橙 | 日報 | 體育 | 20190814

2019/08/14

一代荷蘭中場指揮官史奈達掛靴!繼荷蘭黃金一代成員尹佩斯同洛賓喺今夏宣佈退休,35歲嘅史奈達星期一都返去出生地,同當地球會荷甲烏德勒支簽約加入管理層,宣佈結束17年嘅精采職業生涯,數佢生涯最遺憾嘅事,可能係2010年幫國際米蘭成為三冠王、世盃領荷蘭決賽僅輸西班牙後,金球獎竟然三甲不入!

史奈達效力咗卡塔爾球會艾加拉法年半之後,星期一同烏德勒支簽約成為管理層,終於告別球場:「我勁鍾意烏德勒支呢個城市,我同球會主席關係好好,我家陣已經唔會再踢波喇,但希望有一個地方分享我嘅回憶。」

隨後嘅10年世盃,史奈達繼續大勇,7場世盃入5球,同洛賓、尹佩斯一齊帶領荷蘭殺入決賽,可惜決賽加時一球輸畀西班牙,但係史奈達喺16強、8強、4強3場都有波入,表現受到一致認同,但係同年金球獎三甲就落喺美斯、恩尼斯達同沙維三個巴塞隆拿球員手上,呢年史奈達嘅飲恨,成為其中一屆最大爭議性嘅金球獎。

自此之後,史奈達開始由高𥧌向下,13年已經去咗土超加拉塔沙雷,踢咗四季半後,喺法甲尼斯同卡塔爾嘅艾加拉法完成最後兩年職業生涯,埋單計數,史奈達幫荷蘭上陣過134場係橙軍歷來最多,亦都入過31球,絕對係荷蘭其中一位經典10號仔。