隔牆有耳:冰室珍藏展回到60年代

2017/09/13

唔知冰室係乜?之咪就係茶餐廳嘅前身!
格仔地磚、木卡位同手繪海報,相信都勾起大家唔少回憶,嘆埋菠蘿油、西多士同香滑奶茶,真係有晒地道香港情懷。


■經營半世紀嘅海運茶冰廳手繪掛畫都有得睇。

展出200件餐具擺設

始創中心今個中秋就以「冰室」為主題,邀請咗本地收藏家歐陽偉航,展出超過200件喺60年代以來嘅懷舊冰室珍藏品,包括食具、擺設、掛畫、餐牌、掛牆鐘、告示牌同水吧沖茶工具等;經營半世紀嘅海運茶冰廳入面嘅手繪掛畫,更加係焦點。
「奶茶通俗學」作者崔氏兄弟亦會展出一系列有關冰室嘅文化研究,希望令大家能夠以輕鬆角度,探討冰室飲食嘅通俗文化。
喺今日至10月8日嘅展覽期間,商場仲會變身為傳統冰室格局,綠白相襯紙皮石地板、天花板吊扇同古式時鐘,還原返冰室嘅味道,置身其中,別有味道!

李八方