隔牆有耳:許智峯1.5萬請外交主任

2017/09/13

立法會議員有一筆辦事處營運開支津貼請人,唔知係咪議員嫌津貼太低?似乎出手請人時都比較離地!
近排民主黨立法會議員許智峯透過勞工處網頁,想請一位「國際關係聯絡主任」,個名聽落好勁,5年或以上國際組織工作經驗優先,但月薪竟然只係得1萬至1.5萬元,呢個職位肩負重任,講明要幫許智峯「負責聯繫東南亞、歐洲等國家議員及政府人員,負責聯繫本地及外地國際組織,負責聯繫國際傳媒」。要寫得一手好英文、又要講流利雞腸,月薪1.5萬元,學歷何價?之不過,低處未算低!近排忙於狙擊戴耀廷嘅立法會議員何君堯,請助理嘅月薪只有8,000至1萬蚊,仲要返長短周。做得議員,為民喉舌,但員工待遇如此,似乎都需要議員幫手喎!八方睇過,名店HarveyNichols近排請收銀部主任,每月都有1.65萬,議員係咪要諗吓點樣改善僱員嘅待遇呢?

李八方