隔牆有耳:備戰單車節 錢大康唔想被趕上車

2017/09/13

10月8號就係單車節,好多單車友𠵱家積極備戰。浸大校長錢大康都係單車發燒友,今屆仲拉大隊,同100個師生一齊參賽。佢今年繼續踩50公里賽,志在參與,「目的係完成,唔好俾人掃上車」。

踩50公里話條路唔算斜

錢校長好鍾意運動,羽毛球、網球、潛水、滑雪樣樣皆能,近10年就愛上踩單車,唔怪得八方唔多見佢有肚腩。佢屋企有3架私家單車,逢周六日就會出去踩一個上晝,指定路線包括上水去元朗、大欖郊野公園、鹿頸等等,來回閒閒哋50公里。
佢已經係第3次參加單車節,上年踩50公里賽就用咗大約兩小時10分鐘,「唔想俾人掃上車,惟有搏命踩」。
錢校長話相比起踩上飛鵝山、天壇大佛,單車節嘅公路唔算好斜,不過佢嘅速度肯定唔及年輕車手,「後生速度快,好輕鬆,我就吃力」。

李八方