隔牆有耳:請纓上立會回應質詢 梵哥講義氣 幫邱騰華擋箭

2017/09/13

著名香港愛情哲學家、運房局局長陳帆(梵哥)喺推銷高鐵一地兩檢時,除咗奠定咗「揀選了終身伴侶唔等如放棄其他選擇」學說外,原來佢都係一位相當有情有義嘅人。有政府中人同八方分享,梵哥上任冇幾耐,見到其他同事要回答嘅立法會質詢都關自己事,自動請纓幫拖,都幾唔話得喎。

前朝各局互耍太極

過往問責團隊嘅合作性有幾高,大家都有目共睹;來到奶媽年代又點呢?嗱嗱嗱,梁振英甚至再前朝嘅曾蔭權主政年代,立法會議員提出質詢後,據知若然涉及好幾個政策局,秘書處都會畀相關政策局,之後各局之間會嚟一輪太極推手比試,睇吓邊個局長上陣回應啱key啲。情況去到奶媽上場後,似乎有啲唔同。
唔知大家有冇留意,今年7月初新政府上場後,工聯會立法會議員何啟明提出咗條口頭質詢,詢問有關手機發射站對人體影響嘅質詢,而何啟明問嘅除咗全港有幾多個呢啲發射站數目,亦都問及房委會會唔會將啲好近民居嘅發射站搬走。
雖然呢個提問範疇本身係商經局負責,但據知梵哥得悉有關質詢後,好快就自動獻身話,自己係工程師出身,可以幫拖回應。就係咁,當日負責回覆嘅官員,既有商經局局長邱騰華、亦有運房局局長梵哥,兩位一齊打孖上。梵哥鍾意派bite就人所共知,估唔到派義氣都有一手噃!

李八方

李八方